Á alþjóðlegum degi kennara þann 5. október síðast liðinn tilkynnti Lilja Alfreðsdóttir, mennta- og menningarmálaráðherra, hvaða fimm skólar, kennarar og þróunarverkefni hafa hlotið tilnefningu til Íslensku menntaverðlaunanna 2020. Við getum stolt sagt frá því að leikskólinn Rauðhóll fékk tilnefningu fyrir framúrskarandi og fjölbreytt þróunarstarf og nýsköpun, faglegan metnað, starfsþróun og lýðræðislega starfshætti. Þann 13. nóvember verður tilkynnt hver hlýtur verðlaunin. Á síðu Skólaþróunar má lesa nánar um þessi verðlaun ásamt því hverjir eru í Viðurkenningarráði Íslensku menntaverðlaunanna.

Fyrr á þessu ári eða þann 7. febrúar hlaut starfsfólk Rauðhóls hvatningarverðlaun skóla- og frístundaráðs fyrir þróunarverkefnið Leyndarmál Rauðhólsgleðinnar. Marmkið verðlaunanna er að vekja athygli á góðum verkum og stuðla að nýbreytni- og þróunarstarfi í kennslu leikskólabarna. Þann dag hlaut Guðrún Sólveig, leikskólastjóri einnig viðurkenningu fyrir framúrskarandi faglega forystu í starfi leikskólans Rauðhóls.

Við í Rauðhól erum hrærð yfir þessari miklu viðurkenningu á starfinu okkar. Fyrst og fremst erum við þakklát fyrir allt starfsfólk, foreldra og börn sem hafa komið að því að byggja samfélagið okkar síðustu fjórtán ár. Einnig erum við þakklát skóla- og frístundaráði fyrir styrkveitinguna vegna Leyndarmáls Rauðhólsgleðinnar. Styrkurinn gaf starfsfólki tækifæri til að ígrunda eigin starfshætti og ýtti með því af stað mikilli nýsköpun. Með honum skapaðist líka svigrúm til að hafa verkefnastjórana Sigríði og Elínu Guðrúnu til að halda utan um verkefnið.

Þar sem hvíld er stór þáttur í líkamlegum og andlegum þroska barna hefur verið mörkuð stefna um svefn- og hvíldartíma barna í Rauðhól. Ef foreldrar óska eftir styttingu á svefni í leikskólanum er farið yfir með þeim hvernig svefnrútína er heima áður en til styttingar kemur (Skólanámskrá Rauðhóls, 2019).

Elísa Guðnadóttir sálfræðingur hefur haldið fyrirlestra og skrifað um miklvægi svefns fyrir börn. Meðal annars má nálgast skrif eftir hana hér 

Í nóvember og desember 2019 fór fram ytra mat í   Rauðhól. Matið var framkvæmt af starfsfólki skóla- og frístundasviðs Reykjavíkurborgar.

Meginstef ytra mats í leikskólum er það sama og á öðrum stofnunum skóla- og frístundasviðs: að matið sé leiðbeinandi, framfara- og umbótamiðað og stuðli að betra skóla- og frístundastarfi.

Leiðarljós matsins er það sama og sviðsins í heild; að börnum og ungmennum í borginni líði vel, fari stöðugt fram og þau öðlist uppeldi og menntun fyrir líf og starf.

Þann 7. febrúar 2020 voru niðurstöður matsins kynntar fyrir starfsfólki skólans. Starfsfólk Rauðhóls má vera verulega stolt af niðurstöðum matsins og gefa sér gott klapp á bakið fyrir vel unnið faglegt starf. Skýrsluna í heild sinni ásamt umbótaáætlun má kynna sér hér

 Í Rauðhól er stuðst við og unnið eftir hugmyndafræðinni Uppeldi sem virkar - færni til framtíðar sem er byggð á Uppeldisbókinni eftir Christophersen og Mortweet. Þar er áhersla lögð á jákvæðan aga í uppeldi með skýrum skilaboðum, ákveðnum mörkum, virkri hlustun og mikilvægi fyrirmynda. Þessi aðferð kemur í veg fyrir hegðunarerfiðleika og hjálpar börnum að þróa með sér öryggi ásamt því að kenna þeim leiðir til að róa sig sjálf og efla eigið sjálfstæði og jákvæðni. Hegðun er ekki meðfædd heldur lærist hún. Því er áhersla lögð á í Rauðhól að veita jákvæðri hegðun athygli og hunsa þá neikvæðu. Ef barn missir stjórn á skapi sínu getur þurft að taka það úr aðstæðum. Með því er verið að hunsa neikvæða hegðun barnsins en ekki barnið sjálft. Þannig gefst barninu tækifæri til að jafna sig, barninu sjálfu er hlift og öðrum börnum. Lesa má meira um Uppeldi sem virkar - færni til framtíðar á síðu heilsugæslunnar (Skólanámskrá Rauðhóls, 2019).

Starfsáætlun fyrir skólaárið 2020 til 2021 er komin inn á heimasíðuna undir

Leikskólinn > Stefna og starfsáætlun